BARAZA LA MADIWANI LARIDHIA BAJETI YA SH. BILION 38

Posted on: February 14th, 2025

Baraza la Madiwani la Halmashauri ya Manispaa ya Bukoba limeridhia kupitisha rasimu ya bajeti ya Shilingi 38,923,783,574.60 kwa mwaka wa fedha 2025/2026 ambayo ni zaidi ya shilingi Milioni 300 ukilinganisha na bajeti ya mwaka wa fedha 2024/2025. Aidha Baraza lilijadili mapitio ya utekelezaji wa bajeti inayoendelea ya shilingi Bilion 38.5

Akisoma rasimu hiyo kwa niaba ya Mkurugenzi wa Manispaa ya Bukoba, Mkuu wa Idara ya Mipango na Uratibu Ndg.Melkioni Komba alisema maandalizi ya bajeti hiyo ya 2025/2026 yalizingatia nyaraka na miongozo yote pamoja na kuweka vipaumbale vya Halmashauri.

Alisema, kwa upande wa mapato ya ndani, Halmashauri inatarajia kukusanya zaidi ya shilingi bilioni 4.36 wakati ruzuku kutoka Serikali kuu ikitarajiwa kuwa shilingi bilion 29.66 kadhalika ruzuku ya Wahisani na michango ya Wananchi ikitarajiwa zaidi ya shilingi bilioni 4.89.

Akizungumza katika Mkutano huo, Mkuu wa Wilaya ya Bukoba,  Mhe. Erasto Sima ameipongeza Halmashauri kwa kuandaa bajeti ambayo imegusa nyanja zote za maendeleo na kutoa wito kuendelea kutekeleza miradi ya maendeleo kwa kasi ili kutoa huduma iliyokusudiwa kwa Wananchi  huku akiitaka Halmashauri kuendelea kubuni vyanzo vipya vya mapato.

“Kwa umbile la bajeti hii niliyoiona, mmegusa kila sehemu inayotakiwa kufikiwa na bajeti na nitoe rai kwa Watendaji kuendelea kuimarisha ukusanyaji wa mapato kwenye vyanzo vyote tulivyonavyo, lakini pia tuna kila sababu ya kuendelea kubuni vyanzo vingine vipya vya kuendelea kuongeza mapato kwaajili ya kutekeleza miradi yote tuliyopanga kuitekeleza na hata ile miradi viporo.” Alisema Mhe. Sima.

Vilevile, Mstahiki Meya wa Halmashauri ya Manispaa ya Bukoba Mhe. Godson Gypson amesema, kama Manispaa, hatuwezi kutekeleza miradi ya maendeleo kama hatutaweza kukusanya mapato. Ni jukumu letu sote kuungana kwa pamoja na mshikamano ili kufikia malengo ya bajeti hii kwa ajili ya kuweza kuwaletea Wananchi maendeleo.

Kadhalika, Madiwani wote wameonyesha kuridhia mpango huo wa bajeti ya mwaka wa fedha 2025/2026 upite na kuwa bajeti ya Manispaa wakiamini bajeti hiyo imejikita kwenye kila idara.