DC. SIMA AONGOZA KIKAO CHA MAANDALIZI YA MAPOKEZI YA MWENGE WA UHURU 2025 BUKOBA

Posted on: July 11th, 2025

Mkuu wa Wilaya ya Bukoba, MhMhe Erasto ma, ameongoza kikao cha maandalizi ya mapokezi ya Mwenge wa Uhuru 2025 katika Halmashauri ya Manispaa ya Bukoba, ambapo ametoa rai kwa kamati zote zinazohusika kuendelea na maandalizi kwa bidii ili kuhakikisha mapokezi hayo yanakuwa ya mafanikio makubwa.

Akizungumza katika kikao hicho kilichohusisha wadau mbalimbali wakiwemo viongozi wa Serikali, vyombo vya ulinzi na usalama, wawakilishi wa taasisi binafsi, mashirika ya kijamii pamoja na wananchi, Mhe. Sima alisisitiza umuhimu wa mshikamano na ushirikiano katika kuhakikisha mapokezi ya Mwenge wa Uhuru yanakwenda sambamba na lengo la kutoa hamasa kwa wananchi.

“Naomba kila kamati ichukue jukumu lake kwa uzito unaostahili. Mwenge wa Uhuru siyo tukio la kawaida, ni alama ya mshikamano, maendeleo na uzalendo wetu. Tujitahidi kuhakikisha kuwa kila jambo lipo tayari kwa wakati,” alisisitiza Mhe. Sima.

Mwenge wa Uhuru unatarajiwa kupokelewa rasmi katika Manispaa ya Bukoba tarehe 9 Septemba 2025, ambapo utahusisha shughuli mbalimbali ikiwemo uzinduzi wa miradi ya maendeleo, uwekaji wa mawe ya msingi pamoja na kutembelea na kujionea shughuli zinazofanywa na makundi mbalimbali ya jamii.

Kauli mbiu ya Mwenge wa Uhuru kwa mwaka huu ni “Jitokeze Kushiriki Uchaguzi Mkuu Mwaka 2025 kwa Amani na Utulivu.” Kauli mbiu hii inalenga kuhamasisha wananchi kushiriki kikamilifu katika mchakato wa kidemokrasia kwa njia ya amani na mshikamano.

Manispaa ya Bukoba imeweka mikakati madhubuti kuhakikisha kuwa mapokezi ya Mwenge wa Uhuru yanakwenda sambamba na kauli mbiu hiyo, kwa kuhakikisha kuwa kila mwananchi anapata ujumbe na kushiriki ipasavyo katika shughuli zitakazofanyika.