Dr. Samia awashika mkono wahanga wa mafuriko Bukoba

Posted on: June 27th, 2024

Ofisi ya Waziri Mkuu (Sera, Bunge ma Uratibu) idara ya menejimenti ya maafa imetoa pole kwa waathirika wa maafa yaliyotokea mnamo mwezi Aprili na Mei katika Halmashauri ya Manispaa ya Bukoba na kusababisha madhara kwa mtu mmoja kupoteza maisha, watu 795 kuathirika na kaya 49 zenye watu 147 kuathirika kwa  kukosa makazi na chakula.

Missada hiyo iliyogawiwa na Mkuu wa Wilaya ya Bukoba. Mhe. Erasto Sima kwa kushirikiana na Meya pamoja na Mkurugenzi wa Manispaa, ni blanketi 147, mikeka 98, ndoo za lita kumi na nne na 98 madumu ya maji 98 pamoja na sahani 147.

Aidha, mahindi zaidi ya tani 5 pamoja na vyombo mbalimbali vya nyumbani kama vile sahani navyo viliweza kugawiwa kwa wahanga hao wa mafuriko.

Katika mgawanyo wa vifaa hivyo, kambi ya kituo cha afya, Kashai yenye kaya 18 sawa na watu 93, ilipokea mahindi tani 3, blanketi 93, mikeka 36 sahani na vikombe jumla ya 93 pamoja na mdumu ya maji na ndoo ndogo zote kwa ujumla zikiwa 92.

Aidha, kwa upande wa kambi ya Shule ya msingi Nyamkazi, yenye kaya 31 sawa na watu 54, nayo ilipokea mahindi tani 1.9, blanketi 54, mikeka 62 sahani na vikombe jumla 108 sambamba na madumu ya maji na ndoo ndogo kwa ujumla wake zikiwa 124.

Naye Mtendaji wa Kata ya Miembeni, Blandina Steven akishukuru kwa niaba ya wananchi wake alisema anaishukuru sana Serikali ya Jamhuri ya Muungano wa Tanzania na Rais, Dr. Samia Suluhu Hassan kwa kutuletea misaada hiyo ambayo itawasaidia wale wote waliofikwa na mafuriko na kupelekea kukosa makazi pamoja na vitu vingine vingi vya msingi.

Hata hivyo, Mkuu wa Wilaya aliendelea kuwasisitiza wananchi hao kuendelea kutafuta makazi mapya kwa ajili ya kuhamia kutokana na ukweli kwamba vituo walivyohifadhiwa kwa muda vinapaswa kuwa huru kwa ajili ya huduma zingine za msingi kuendelea kama vile zahanati pamoja na shule  ambazo zinakwenda kufunguliwa kuanzia wiki ijayo.