KAMATI YA LISHE BUKOBA MANISPAA YAWEKA MIKAKATI YA KUHANIKIZA CHAKULA MASHULENI

Posted on: January 16th, 2026

Kamati ya Lishe ngazi ya Halmashauri ya Manispaa ya Bukoba imeendelea kuweka mikakati mbalimbali ya kuwahamasisha wazazi na walezi kuchangia chakula mashuleni, kwa lengo la kuwawezesha wanafunzi kupata chakula wakiwa shuleni na hivyo kuboresha mahudhurio na ufaulu wao.

Kikao hicho kimefanyika tarehe 16 Januari 2026, katika Ukumbi wa Mikutano wa Halmashauri ya Manispaa ya Bukoba, kikihusisha wadau mbalimbali wa lishe pamoja na viongozi wa Halmashauri, huku wakijikita kujadili hali ya lishe kwa wanafunzi na changamoto zinazokwamisha utekelezaji wa mpango wa chakula mashuleni.

Akizungumza katika kikao hicho, Mkurugenzi wa Halmashauri ya Manispaa ya Bukoba, ndugu Jacob Nkwera, amesisitiza umuhimu wa ushirikiano kati ya Halmashauri, shule na wazazi katika kuhakikisha kila mtoto anapata chakula shuleni. Amesema lishe bora kwa watoto ni msingi wa maendeleo ya elimu na afya kwa ujumla.

Kwa upande wao, wakuu wa Idara na Vitengo pamoja na waratibu wa lishe wamewasilisha mikakati mbalimbali ikiwemo kuimarisha uhamasishaji kwa jamii, kushirikisha viongozi wa Kata na mitaa, pamoja na kuandaa miongozo itakayowasaidia wazazi kushiriki kikamilifu katika mpango wa chakula mashuleni.

Wadau wa lishe waliohudhuria kikao hicho wamepongeza juhudi zinazofanywa na Halmashauri na kuahidi kuendelea kushirikiana katika utekelezaji wa mikakati iliyowekwa. Wamesema juhudi za pamoja zitasaidia kupunguza changamoto za lishe duni na kuongeza ustawi wa watoto waliopo mashuleni.

Kwa ujumla, kikao hicho kimehitimishwa kwa azimio la kuendelea kusimamia kwa karibu utekelezaji wa mikakati hiyo, ili kuhakikisha wanafunzi wa Manispaa ya Bukoba wanapata lishe bora wakiwa shuleni na kutimiza malengo ya elimu bora kwa wote.