RAIS SAMIA AMJENGEA NYUMBA BI CATHERINE NA WAJUKUU ZAKE SITA

Posted on: August 23rd, 2025

Mwandishi wetu Kagera.

*Bi. Catherine Nathahiel na wajukuu zake sita walipoteza makazi baada ya Nyumba waliyokuwa wakiishi awali kukumbwa na mafuriko yaliyotokea Manispaa ya Bukoba mkoa Kagera Mei 10,2024.

*Bukoba. Serikali imemkabidhi nyumba Bibi na wajukuu zake sita aliyojengewa na Rais Samia Suluhu Hassan baada ya kupoteza makazi kwa mafuriko mwaka 2024.

*Halmashauri ya Manispaa ya Bukoba ilikumbwa na mafuriko makubwa Mei 10,2024 yaliyosababishwa na mvua iliyonyesha kwa wingi siku tatu mfululizo kisha kupelekea mto Kanoni kufurika na maji kuleta madhara kwa baadhi ya makazi ya watu wanaopakana na mto huo katika kata za Nshambya na Bilele.

*Aliyekuwa mkazi wa mtaa Migera, Kata Nshambya, Bi Catherine Nathahiel na wajukuu zake sita ni miongoni mwa wananchi waliyopata madhara ya nyumba yao waliyokuwa wakiishi awali kuporomoka na kusombwa na maji ya mafuriko.

Mkuu wa Mkoa Kagera, Mhe. Fatma Mwassa leo Jumapili, Agosti 24,2025 amemkabidhi Bi Catherine Nathahiel na wajukuu zake Sita kiwanja na nyumba yenye vyumba viwili vya kulala aliyojengewa na Rais wa Jamhuri ya Muungano wa Tanzania Dk Samia Suluhu Hassan baada ya kupoteza makazi kwa mafuriko.

Amesema kiwanja na nyumba vimepatikana kwa gharama za Serikali ikiwa ni ahadi ya Rais Samia ili kunusuru familia hiyo ambayo haikuwa na makazi kamili ya kuishi tangu mwaka 2024.

Mwassa, licha ya kutotaja gharama zilizotumika kununua kiwanja na ujenzi ameongeza kuwa nyumba hiyo imejengwa katika Kiwanja kilichopimwa na Halmashauri na kupewa hati namba 102 kwenye kitaru F kata ya Buhembe Manispaa ya Bukoba.

"Kipindi hicho Baada ya kukagua athari za Mafuriko sisi kama Serikali tulibaini hii familia yenye wajukuu sita ilipoteza kila kitu na hatua zetu za haraka tulitoa msaada wachakula na vifaa vya shule kwa wanafunzi"

"Taarifa zilipomfikia Rais, Samia alitupatia maagizo kuwa familia hii yenye watoto sita waliyopoteza wazazi wote itafutiwe makazi ya kudumu kwa gharama za Rais na wasipelekwe vituo va kulelea yatima hivyo tumetekeleza na leo ndo maana tunawakabidhi nyumba na kiwanja hiki chenye hati" amesema Mwassa.

Mkuu wa wilaya Bukoba, Mhe. Erasto Sima awali akisoma taarifa fupi ya kukabidhi kiwanja na nyumba hiyo kwa Bibi Catherine na wajukuu zake sita amesema mpaka sasa familia hiyo ilikuwa inaishi kwa mtumishi wa Serikali idara ya afya Adelina Wilson tangu walipopata madhira hayo.

"Adelina aliwasaidia sehemu ya kuishi tangu alipogundua hawana msaada nasisi kama Serikali asingekuwa yeye na vyombo vya habari tusingejua kama kuna familia inateseka na aliomba aendelee kuishi nao mpaka leo" amesema.

Aidha, Bibi Catherine amemshukuru Rais Samia na Serikali kwa kuwakumbuka na kuwafuta machozi kwa kuwajengea nyumba hiyo na kuahidi kuendelea kuwatunza wajukuu zake kwa kulinda pia afya zao.

Ameongeza kuwa wajukuu zake anaishi nao kwasababu amepoteza mme wake muda mrefu na vijana wake watatu tegemezi waliyofariki ambao walikuwa wazazi wa watoto.

Bibi Catherine, wajuu zake wanne ni wakiume na wawili wakike miongoni mwao mmoja wao ambaye ni mwanafunzi wa kidato cha pili shule ya Sekondari Hamugembe, Loveness Matungwa amesema nikama muujiza maana tangu wamewapoteza wazazi wao hawakutegemea kama siku moja watalala sehemu salama kama nyumba waliyojengewa na Rais Samia.