RC. KAGERA AWATAKA WAKANDARASI WA MIRADI YA TACTICS KUKAMILISHA KAZI KWA WAKATI NA UBORA

Posted on: July 23rd, 2025

Mkuu wa Mkoa wa Kagera, Mheshimiwa Hajat Fatma Mwassa, amewataka wakandarasi watakaojenga miradi ya Uboreshaji wa Miundombinu ya Miji ya Tanzania (TACTICS) kuhakikisha wanatekeleza miradi hiyo kwa ubora unaotakiwa na kuikamilisha kwa wakati.

Akizungumza katika hafla ya kuwakabidhi rasmi wakandarasi maeneo ya ujenzi, iliyofanyika katika viwanja vya Soko Kuu mjini Bukoba, Mhe. Mwassa aliwahimiza wakandarasi kuwa na nidhamu ya kazi na kuhakikisha fedha za miradi zinatumika ipasavyo.

“Naomba nitoe wito kwa wakandarasi wetu kuwa hatutaki kuona ucheleweshaji. Sifa ya mkandarasi mzuri ni yule mwenye uwezo wa kifedha na anayetimiza wajibu kwa wakati. Wananchi, nawasihi tutoe ushirikiano wa kutosha na tuwe mabalozi wa miradi hii kwa kuilinda, maana ni yetu sote.” alisema Mhe. Mwassa.

Kwa upande wake, Mbunge wa Jimbo la Bukoba Mjini, Mhe. Steven Byabato, alieleza furaha yake kuona kuwa ndoto ya utekelezaji wa miradi hiyo hatimaye ikianza kutimia akiwa bado mbunge.

“Tangu mwaka 2020 tumekuwa tukipambana na viongozi mbalimbali kuanzia ngazi ya Halmashauri kuhakikisha miradi hii inapatikana. Leo nashukuru kuona utekelezaji wake unaanza, nami nikiwa bado mbunge wa jimbo hili.” alisema Mhe. Byabato.

Naye Mratibu wa Miradi ya TACTICS, Injinia Emmanuel Yohana, alieleza kuwa miradi hiyo itakuwa kichocheo muhimu cha maendeleo ya mji wa Bukoba na kuleta tija kwa wananchi.

“Hii ni miradi ya kimkakati inayolenga kuboresha maisha ya wananchi kwa kuboresha miundombinu muhimu ya mji wetu.” alieleza.

Miradi hiyo inatarajiwa kuanza rasmi kutekelezwa Julai 15, 2025, na inahusisha ujenzi wa stendi ya mabasi Kyakailabwa, ujenzi wa soko kuu la Bukoba, ujenzi wa kingo za mto Kanoni, ujenzi wa barabara za mjini zenye urefu wa zaidi ya kilomita 10 pamoja na ufungaji wa taa za barabarani zaidi ya 400

Jumla ya gharama za utekelezaji wa miradi hiyo ni shilingi bilioni 40.2, na inatarajiwa kukamilika ndani ya kipindi cha miezi 15.