RC. MWASSA AFUNGUA MAFUNZO YA WAHESHIMIWA MADIWANI, AWASISITIZA ZAIDI UPENDO NA MSHIKAMANO.

Posted on: February 2nd, 2026

Mkuu wa Mkoa wa Kagera Mhe. Hajjat Fatma Mwassa amefungua rasmi mafunzo maalum kwa Waheshimiwa Madiwani wa Halmashauri za Manispaa ya Bukoba, Halmashauri ya Wilaya ya Bukoba pamoja na Missenyi, akiwataka kuzingatia misingi ya upendo, mshikamano na uwajibikaji katika utekelezaji wa majukumu yao ya kuwasimamia wananchi na miradi ya maendeleo.

Akizungumza wakati wa ufunguzi wa mafunzo hayo, RC Mwassa alisema kuwa madiwani wana nafasi kubwa na ya kipekee katika kuhakikisha maendeleo yanawafikia wananchi kwa wakati na kwa ufanisi, kwani wao ndio wawakilishi wa moja kwa moja wa wananchi katika ngazi za Serikali za mitaa.

Amesisitiza kuwa bila mshikamano na ushirikiano miongoni mwa Madiwani, viongozi wa Halmashauri na Wataalamu, utekelezaji wa miradi ya maendeleo unaweza kukumbwa na changamoto zisizo za lazima. “Upendo na mshikamano ni nguzo muhimu katika uongozi. Bila hivyo, hata rasilimali zilizopo haziwezi kuleta matokeo yaliyokusudiwa” amesema RC Mwassa.

RC Mwassa amewataka Madiwani kuwa sauti ya kweli ya wananchi waliowachagua kwa kusikiliza kero, maoni na mapendekezo yao, na kuyawasilisha kwa ujasiri katika vikao halali vya maamuzi. Aidha, amewakumbusha kuwa dhamana waliyopewa na wananchi inapaswa kulindwa kwa vitendo, uadilifu na uwazi.

Katika mafunzo hayo ambayo yatafanyika kwa siku tatu kwenye ukumbi wa Mikutano wa ELCT Bukoba Mjini, mada mbalimbali zinatarajiwa kujadiliwa ikiwemo usimamizi wa miradi ya maendeleo, matumizi sahihi ya rasilimali za umma, maadili ya uongozi, pamoja na majukumu na mipaka ya viongozi wa kuchaguliwa katika ngazi za Halmashauri.

Kwa upande wao, baadhi ya Waheshimiwa Madiwani walioshiriki mafunzo hayo wameeleza kuwa mafunzo hayo ni muhimu katika kuwajengea uwezo na kuwapa mwelekeo wa pamoja katika utekelezaji wa majukumu yao, hasa katika kipindi hiki ambacho Serikali inaendelea kusisitiza uwajibikaji na thamani ya fedha.

Mafunzo hayo yanatarajiwa kuongeza ufanisi wa utendaji kazi wa madiwani na kuchangia kwa kiasi kikubwa kasi ya utekelezaji wa miradi ya maendeleo, huku yakilenga kuimarisha mahusiano mema kati ya viongozi na wananchi wanaowawakilisha