Walengwa wa TASAF Manispaa ya Bukoba wapokea mil. 112.8

Posted on: March 21st, 2018

Walengwa wa TASAF Manispaa ya Bukoba wapokea mil. 112.8

Manispaa ya Bukoba imeendelea kuneemesha walengwa wa mpango wa TASAF kwa kuwapatia shilingi  milioni 112,856,000. Uhawilishaji fedha huo wa ni dirisha la 17 tangu TASAF ianze rasmi na unafanyika kwenye mitaa 45 katika kata mbalimbali. Mradi umelenga kuwasaidia walengwa hao kuboresha makazi, kuanzisha ujasiriamali na/au kuboresha miradi yao ya kilimo na kadharika.

Akizungumza kwenye kikao cha maandalizi ya uhawilishaji fedha na wawezeshaji ngazi ya Wilaya kilichofanyika kwenye Ofisi ya TASAF Machi 14 mwaka huu, Mratibu wa TASAF wa Manispaa ya Bukoba Bw. Japhet Kanoni, amewataka wawezeshaji wakatoe semina kwa walengwa juu ya matumizi sahihi ya fedha  za mpango.

“Wajitahidi kuanzisha miradi midogo midogo kama ya ujasiriamali au waboreshe miradi yao ya kilimo lakini pia wafanye ukarabati maeneo yao ya kuishi na kuna wengine ambao wanaweza kuingia kwenye miradi ya ufugaji na kadharika”  alisema  Kanoni, na kuwaasa kuwa kuna shughuli inaendeshwa na maafisa ugani kwa kila mtaa ambao watawapitia walengwa hao, wahakikishe wanawaonyesha miradi yao ili wapatiwe ushauri wa kitaalamu utakaofanya miradi yao iwe na tija.

Kanoni anaendelea kusisitiza kwamba watoto wote ambao wameandikishwa shule na wanaohudhuria kiliniki, wasikose kwenda shuleni au kiliniki. Wakikosa kuhudhuria watasababisha fedha zao zipungue au zikatwe kwa sababu ya kutotimiza mashariti ya mpango huo.

Uelimishaji kwa walengwa umefanyika kwa siku nne kuanzia  machi 15hadi 19 mwaka huu ambazo zilikuwa siku za uhawilishaji fedha katika mitaa tofauti tofauti.

Miongoni mwa Walengwa walioshiriki mafunzo hayo na kupokea fedha ya mpango huo ni kutoka mitaa ya Kafuti, Buyekera, Nyakanyasi, Zamzam, Omukigusha, Bulibata, Kyasha, Ntungamo, Omukituli, Anyama,Uhuru , Forodhanu, Kabangamilembe, Nyangoye, Omukishenye, Ijuganyondo B, Kabalekangaiza, Kagondo kaifo, Kaluguru, Kyamuzinga na Bushwa. Mitaa mingine ni pamoja na Kyaya, Makongo, Rwazi, Katatolwanso, Kisindi, Matopeni, Rwome, Nyamulugo,Bugambakamoi,Busimbe A, Busimbe B, Kagemu, Kalelabana, Kyamuhumula, Msira, Nyamukazi, Bunkango, Bushaga, Ihyoro, Kyamyosi, Nyarubanja,Rubumba, Kamizilente na Rwamishenye.

Kwa upande wa walengwa wa mpango huo, wameishukuru na kuisifia Serikali ya awamu ya tano kwa kuwakumbuka katika dirisha la 17 huku wakiwahakikishia wawezeshaji ngazi ya Wilaya kuwa Serikali itegemee matokeo chanya hasa baada ya mafunzo hayo ya mara kwa mara ya  kuwajengea uwezo.

“Mimi napenda kuishukuru TASAF kwa kuwa tulikuwa tunaishi kwenye nyumba ya nyasi lakini sasa tushaezeka bati na tumenunua mbuzi mmoja” alisema Bi Modesta Koku Joseph kutoka mtaa wa Bulibata kata ya Buhembe. Halikadhalika amewashauri walengwa wengine wa mpango watumie fedha wanayopokea kulingana na malengo yaliyokusudiwa.

Mlengwa kutoka mtaa wa Nyakanyasi, Bi Winifrida Sylivesta Mutakangwa anashukuru Serikali. Yeye alikuwa hana mtaji lakini kuptia TASAF amepata mtaji na anafanya biashara ndogo ndogo ya kuuza samaki.

“Kwa upande wangu kwa kweli nimenufaika na mpango kwa sababu sikuwa na mtaji ambao ulikuwa umekamilika, niliongeza mtaji sasa nanunua samaki nabanika, nilinunua wavu na vifaa vingine vya kutumia   na mambo mengine ” alisema Winifrida Sylivesta Mutakangwa.

Fedha hizo zimetolewa kwa walengwa 3,190 kutoka mitaa 45. Hata hivyo, fedha iliyotolewa na Serikali shilingi 112,856,000 ni dirisha la 17 la uhawilishaji fedha, ikiwa na lengo la kuwafanya walengwa wajinasue kwenye dimbi la umasikini.