WANAVIKUNDI WA FAO MANISPAA YA BUKOBA WAPIGWA MSASA

Posted on: May 4th, 2018

Jackson Mahongo ambaye ni mratibu mradi wa Shirika la Chakula na Kilimo Duniani-FAO ngazi ya Manispaa ya Bukoba, alifungua rasmi mafunzo juu ya matumizi bora ya pembejeo.

Miongoni mwa wawezeshaji alioambatana nao katika mafunzo hayo yanayoendelea kwa siku tatu (tarehe 03, 04 na 07 mei,2018) katika ofisi za kata saba za Manispaa ya Bukoba ni; Omary Mussa, Anelita Bukenya, Evodius Simon, Viviano Msigula, Venitha Charles, Novert Nyemenohi, Filbert Kimario, na Dedan Sombe ambao kitaaluma ni maafisa kilimo na mifugo.

Bw. Mahongo amesema kuwa wafadhili wameleta pembejeo ziko ofisini ambazo ni mbegu za mazao ya bustani, mbolea, dawa na vifaa vya ujenzi wa mabanda. “Tumeona kuwa ni vyema kabla ya kugawa hizi pembejeo kwa wakulima ni vema kupita kwa kila kikundi na kuwapa maelekezo ” alisema  Mahongo na amesisitiza kwamba baada ya mafunzo hayo pembejeo zitagaiwa kwa kila kikundi.

Miongoni mwa vikundi vinavyofadhiliwa na mradi wa FAO na kushiriki mafunzo hayo ni; Samuli group na Tuinuane group kutoka kata ya Bakoba, Tweyambe group, Faidika group na Mkombozi group kutoka kata ya Ijuganyondo, tegemeza group,shukuru group,na Tweyambe group kutoka kata ya Kibeta. Vikukundi vingine ni pamoja na; Twejune group kutoka kata ya Kahororo, Mapambano group kutoka kata ya Nyanga, Tutashinda group kutoka kata ya Kagondo na Tuinane group kutoka kata ya Kitendaguro.

Bw. Filbert Kimario ambaye kitaaluma ni maafisa kilimo, akiwa katika ofisi ya kata Kitendaguro na kikundi cha Tuinuane group amepitisha wanakikundi hao katika mada ya kanuni bora za kilimo. Ameshirikiana na wanakikundi kujadili kanuni hizo ambazo ni pamoja na; kuchagua eneo la rutuba/tifutifu, kutayarisha shamba kwa kufyeka, kupulizia dawa ya wadudu, kutumia mbolea ya asili/viwandani, kutayarisha mbolea bora mapema, kupanda kwa nafasi inayotakiwa na kupalilia kwa wakati. Kanuni nyingine bora za kilimo ni kidhibiti magonjwa, ndege na wadudu, kuvuna kwa wakati, kutunza kumbukumbu za uzalishaji na kuandaa vifaa vya kuifadhi mazao.

Kwa upande wa washiriki wa mafunzo hayo, wameisifia Serikali na Shirika la Chakula na Kilimo Duniani-FAO  kwa kuwakumbuka na kuwapatia pembejeo. Aidha, wamewashukuru maafisa kilimo na mifugo wa Halmashauri ya Manispaa ya Bukoba kwa kuwapatia elimu ya kilimo cha mboga/bustani na ufugaji, huku wakimhakikishia Mratibu wa Mradi wa FAO ngazi ya Manispaa kuwa Serikali itegemee matokeo chanya hasa baada ya mafunzo hayo ya kujengewa uwezo.

 “Kwa kweli walivyotuelekeza kwenye mafunzo tutayafanyia kazi,” Alibainisha Adelina Simon ambaye ni mwanakikundi wa Tuinuane group kata Kitendaguro, katika siku ya pili ya mafunzo hayo yanayotarajiwa kuhitimishwa mnamo tarehe 07 Mei, 2018.