WAZIRI NANAUKA AVUTIWA NA UBUNIFU WA VIJANA KONGANI YA BUKOBA MANISPAA

Posted on: January 25th, 2026

Waziri wa Nchi, Ofisi ya Rais – Maendeleo ya Vijana, Mhe. Joel Arthur Nanauka, leo tarehe 25 Januari 2026, ameendelea na ziara yake ya kikazi yenye lengo la kuwafikia vijana na kujionea kwa karibu miradi yao ya ubunifu na ujasiliamali, kwa kutembelea Kongani ya Vijana iliyopo Manispaa ya Bukoba.

Katika ziara hiyo, Mhe. Nanauka alipata fursa ya kujionea na kuvutiwa na miradi mbalimbali ya kiuchumi inayotekelezwa na vijana katika kongani hiyo, ikiwemo shughuli za ufundi seremala, karakana ya ukarabati wa magari, utengenezaji wa bidhaa za alumini, darasa la ususi wa nywele pamoja na miradi ya utengenezaji wa vifungashio.

Akizungumza baada ya kutembelea miradi hiyo, Mhe. Waziri alibainisha kuwa miradi yote ni matokeo ya ubunifu wa vijana wenyewe na imelenga kuwawezesha kujiajiri, kuongeza kipato na kuchangia kwa kiasi kikubwa maendeleo ya uchumi wa eneo husika. Alieleza kufurahishwa kwake na namna vijana hao walivyotumia fursa zilizopo kubuni na kuendesha miradi yenye tija.

Mhe. Nanauka aliwapongeza vijana hao kwa bidii, ubunifu na uthubutu wao, akisisitiza kuwa juhudi hizo zinaendana na dhamira ya Serikali ya kuwajengea vijana uwezo wa kiuchumi na kupunguza changamoto ya ajira.

Aidha, aliwahimiza vijana kuendelea kuchangamkia fursa mbalimbali zinazotolewa na Serikali, ikiwemo mafunzo ya ujasiliamali, upatikanaji wa mitaji kupitia mifumo ya Serikali pamoja na kushirikiana na taasisi husika ili kuimarisha na kupanua wigo wa miradi yao.

Kadhalika, Mhe. Waziri alisema amezipokea changamoto zote zilizowasilishwa na vijana hao na kuahidi kuzifikisha katika mamlaka husika kwa ajili ya kufanyiwa kazi, ili kuendelea kujenga mazingira wezeshi yatakayowawezesha vijana kufanya kazi kwa ufanisi na kuendeleza ubunifu wao.