YALIYOJIRI MKUTANO WA BARAZA LA MADIWANI KUPOKEA TAARIFA ZA KATA KWA KIPINDI CHA ROBO YA PILI 2024/2025

Posted on: January 27th, 2025

Halmashauri ya Manispaa ya Bukoba imefanya Mkutano wa Baraza la Madiwani kwa ajili ya kujadili taarifa kutoka kwenye Kata kwa kipindi cha robo ya pili ya mwaka wa fedha 2024/2025. Machache katika mengi yaliyoibuka kwenye Mkutano huo nia kama ifuatavyo,

Hali isiyoridhisha ya ukusanyaji mapato iliyompelekea Mhe. Mstahiki Meya wa Halmashauri ya Manispaa ya Bukoba kutoa msisitizo na kuendelea kubuni njia mbalimbali za ukusanyaji wa mapato kwa ajili ya kuendelea kutekeleza miradi mbalimbali inayopaswa kutekelezwa.

Diwani wa Kata ya Bakoba, Mhe. Shaban Rashid wakati wa uwasilishaji wa taarifa ya Kata yake, pamoja na maombi yake yote, amesisitiza swala la ujenzi wa soko la dagaa ambalo ndilo soko kuu kwa wafanyabiashara wa dagaa kwenye Kata hiyo na Mji wa Bukoba kwa ujumla.

Aidha Baraza la Madiwani Halmashauri ya Manispaa ya Bukoba limempomgeza Mhe. Rais wa Jamhuri ya Muungano wa Tanzania, Dr. Samia Suluhu Hassan kwa kuteuliwa kuwa Mgombea wa Urais kwenye Uchaguzi mkuu utakaofanyika mwezi Oktoba, 2025. Kadhalika madiwani hao wamemtakia heri Rais Samia kwa kumbukizi ya siku yake ya kuzaliwa.

Vilevile suala la kutengeneza miundombinu ya maeneo mbadala yatakayotumika na Wafanyabiashara kupisha ujenzi wa soko kuu Mjini Bukoba, yameripotiwa kukamilika kwa zaidi ya asilimia 98 wakati huohuo timu TACTIC wakiweka bayana kuanza kuwahamisha Wafanyabiashara hao mapema ifikapo mwezi Februari.

Aidha, Mkuu wa Wilaya ya Bukoba, Mhe. Erasto Sima amendelea kuwasisitiza Watendaji wa Kata kuendelea kuwafuatilia wazazi wa watoto wote wanaostahili kuripoti mashuleni na hawajafanya hivyo kuanzia wale wa darasa la awali, la kwanza pamoja na wale wanaojiunga na kidato cha kwanza akisisitiza kuwa hata kama watakosa mahitaji muhimu, ni vema wakaripoti na kuanza masomo wakati wazazi wakijiandaa kumalizia mahitaji ya wanafunzi hao.