"HATIBU OR-TAMISEMI: "TUENDELEE KUFUATILIA NA KUSIMAMIA MIRADI YETU KWA UKARIBU"

Posted on: May 27th, 2025

Timu ya Wataalam ya tathmini na ufuatiliaji kutoka Ofisi ya Rais TAMISEMI imewataka Wataalam kutoka Manispaa ya Bukoba kuendelea kufuatilia na kusimamia kwa ukaribu miradi mbalimbali inayotekelezwa na ile ambayo imekamilika na ipo tayari kwa ajili ya kutumika.

Hayo yamebainishwa leo tarehe 27/5/2025 na Ndg. Abdulrahman Hatibu kutoka OR-TAMISEMI wakati timu hiyo ilipokagua miradi mbalimbali inayotekelezwa ndani ya Halmashauri ya Manispaa ya Bukoba pamoja na Wataalam wa Manispaa ya Bukoba wakiongozwa na Kaimu Mkuu wa Kitengo cha Tathmini na Ufuatiliaji sambamba na maafisa wengine kutoka Idara mbalimbali.

Wakati wa ukaguzi, jopo hili lilipata wasaa wa kutembelea nyumba ya Mkurugenzi wa Manispaa, ujenzi wa Stendi ya mjini kati, pamoja na miradi ya elimu ambapo walipata wasaa wa kutembelea shule ya Msingi Byabato iliyoko Kashenye pamoja na ujenzi wa shule mpya ya sekondari iliyopo Kata ya Ijuganyondo, shule ambayo ipo katika hatua ya ukamilishwaji.

Wakiwa katika shule ya Msingi Byabato, Wataalam hawa wamesisitiza pia utunzwaji wa majengo pamoja na vifaa muhimu vya kujifunzia ili viweze kutumika kwa muda mrefu.

“Serikali yetu imeendelea kutoa fedha nyingi sana kwa ajili ya ujenzi wa miundombinu hii ya watoto wetu, nikusihi mwalimu mkuu na wenzako muendelee kuyatunza majengo pamoja na samani zilizopo madarasani ili hata ile thamani ya fedha inayotolewa iweze kuonekana” Amesema Hatibu.

VIlevile, ziara hii iliweza kupita Kata ya Kagondo kwa ajili ya kujionea ujenzi wa nyumba ya walimu 2 kwa 1 shule ya sekondari Kyamigege iliyojengwa kwa fedha shilingi Miliomi 100 na tayari nyumba hii imekamilika na ipo tayari kwa matumizi

Ziara hii ya timu ya Wataalam kutoka TAMISEMI ni sehemu ya ziara inayofanyika nchini kwa ajili ya kujionea miradi mbalimbali imayoendelea kutekelezwa sambamba na ilie ambayo imetekelezwa kwenye utawala wa awamu ya sita unaoongozwa na Rais wa Jamhuri ya Muungano wa Tanzania Dkt. Samia Suluhu Hassan.