KAMATI YA MIPANGO MIJI YATHIBITISHA MANISPAA KUMILIKI ENEO LA GYMKANA. BUKOBAMC

Posted on: July 11th, 2024

Mkuu wa Idara ya Mipango Miji na Mazingira, Ndg. Kurwa Hanta kwa niaba ya Mkurugenzi wa Manispaa ya Bukoba, Ndg. Jacob S. Nkwera, ameiambia kamati ya Mipango Miji na mazingira kuwa Kamati imefanikiwa kutwaa eneo lililokuwa likimilikwa na mtu binafsi na kuwa mali halali ya Halmashauri.

Eneo hilo ambalo linajulikana kama kiwanja cha Gymkana, lililopo pembezoni mwa ziwa Victoria, lina ukubwa wa hekari zaidi ya 11 na limepangwa kuwa kama eneo la burudani (Recreational Centre) na litakuwa chini ya Manispa ya Bukoba.  

Ndugu Hanta ameyasema hayo, leo tarehe 11/07/2024 wakati Kamati ya Mipango Miji na Mazingira ya Manispaa ya Bukoba ilipokuwa katika ziara ya kutembelea na kukagua miradi mbalimbali ambayo imejengwa  au inatekelezwa na Halmashauri kwa mwaka wa fedha 2023/2024.

Awali, historia ya umiliki wa kiwanja hicho ulikuwa chini ya Ndg. Robert Henry Escolme na Thomas mwaka 1927 ambao walimilikishwa kwa hati ya miaka 99 kikiwa na ukubwa wa hekari 41 na mwaka 1939, umiliki ulihamia kwa Bodi ya Wadhamini ya Bukoba Gymkana Club ambao nao baadae walibadilisha jina na kujulikana kama Bodi ya Wadhamini wa Bukoba Club mwaka 2019.

Kufuatia jitihada za Halmashauri ya Manispaa ya Bukoba, Bodi  ya Wadhamini wa Bukoba Club walikubali kurejesha sehemu ya ardhi na hivyo kuruhusu upangaji na upimaji mpya ambapo kwa sasa mgawanyo wa ardhi hiyo ni Halmashauri kuchukua hekari 11.6, Bodi ya Wadhamni ya Bukoba Club kubaki na hekari 3.7 na wakati huo Shule ya Lake wakiwa na hekari 4.4.

Naye Mstahiki Meya wa Manispaa Mhe. Godson R. Gypson, aliipongeza kamati hiyo ya Mipango Miji na Mazingira kwa kufanikisha kutwaa eneo hilo na kuwa mali halali ya Halmashauri na kueleza kuwa kwa sababu ya umuhimu wa eneo hilo na sehemu lilipo, linaweza kuchangia kwa kiasi kikubwa upatikanaji wa mapato ya Halmashuri kama wataalamu wa Manispaa  wataweka mikakati mizuri ya kulitumia na kujiingizia kipato.

Upimaji na upangaji wa ardhi hiyo umekamilika kwa asilimia mia moja ambapo kiwanja hicho kinajulikana kama Kiwanja Na. 164 Kitalu ‘1’ Bukoba Town na kikiwa na Hati namba 7545