OFISI YA RAIS-TAMISEMI NA WIZARA YA AFYA WAJA NA NAMBA YA BAHATI KWA MAMA WAJAWAZITO

Posted on: July 8th, 2024

Ofisi ya Rais-TAMISEMI kwa kushirikiana na Wizara ya Afya wametoa mafunzo ya siku moja kwa Maafisa Habari, Waelimisha Umma na Waratibu wa Mfumo wa m-mama ngazi ya Mkoa na Halmashauri katika Mkoa wa Kagera jinsi ya kuelimisha jamii kuhusu mfumo wa m-mama wa rufaa zitakazotoka katika jamii kwenda vituo vya afya pamoja na matumizi ya namba ya bure ya 115.

Mafunzo hayo yamefanyika katika ukumbi wa BCD Stella Hotel uliopo Manispaa ya Bukoba Mkoani Kagera ambapo Maafisa Habari, Waelimisha Umma na Waratibu wa Mfumo wa m-mama ngazi ya Mkoa na Halmashauri wametakiwa kushirikiana na waratibu wa m-mama Mkoa wa Kagera katika uelimishaji wa jamii juu ya mfumo wa m-mama na matumizi ya namba ya bure ya 115 inapotokea dharura ya haraka kwa mama mjamzito, mama aliyejifungua ndani ya siku 42 na mtoto mchanga aliye ndani ya siku 28.

Akitoa mafunzo hayo, Catherine Kavula kutoka Ofisi ya Rais-TAMISEMI alisema kuwa, namba 115 ni namba maalum ambayo wananchi wanaendelea kusisitizwa kuitumia kwa kupiga simu BURE pale inapotokea dharura kwa mama mjamzito kama vile kutokwa damu sehemu za siri, kutokwa maji maji yenye harufu sehemu za siri pamoja na kuumwa kichwa ili mama huyo aweze kufuatwa haraka na kuwahishwa katika kituo cha afya kilicho karibu nae kwa ajili ya matibabu kupitia usafiri wa Ambulance au Madereva Jamii wa m-mama bila mteja kulipia malipo yoyote kwa huduma ya usafiri huo.

“Maafisa Habari, Waelimisha Umma na Waratibu wa m-mama tunaamini mnao uwezo mkubwa wa ufikishaji wa taarifa kwenye jamii kupitia njia mbalimbali, wengine hapa ndiyo mnaoendesha kurasa za mitandao ya kijamii za taasisi na serikali na wengine mnawafikia moja kwa moja wananchi, tumieni njia hizo kuelimisha jamii juu ya namba 115, kupitia elimu hiyo mtakuwa mmesaidia kutimiza adhima ya serikali katika kuokoa maisha ya mama wajawazito na watoto wachanga"

Sambamba na hilo, kupitia mafunzo hayo wataalam hao wameweza kutengeneza Mpango Kazi wa Mkoa unaolenga kuwafundisha na kuwaelimisha viongozi wa ngazi zote pamoja na wananchi ili kuwa na uelewa wa kutosha juu ya matumizi sahihi ya namba 115.