WASIMAMIZI WASAIDIZI WA UCHAGUZI WA SERIKALI ZA MITAA WAPIGWA MSASA

Posted on: September 30th, 2024

Na Charles Kunji

Msimamizi wa Uchaguzi wa Serikali za Mitaa wa Halmashauri ya Manispaa ya Bukoba ambaye pia ni Mkurugenzi wa Manispaa hiyo Ndg. Jacob S. Nkwera, leo amefungua  mafunzo maalum kwa wasimamizi wasaidizi wa ngazi ya kata na kijiji wapatao 80 ili kuwaandaa kwa ajili ya Uchaguzi wa Serikali za Mitaa ambao unatarajia kufanyika tarehe 27/11/2024.

Mafunzo hayo ambayo yamefanyika katika Ukumbi wa Halmashauri ya Manispaa ya Bukoba, yanalenga kuwapitisha Wasimamizi wasaidizi ngazi ya Kata na Vijiji taratibu mbalimbali zitakazotumika kwenye Uchaguzi huo sambamba na sheria na Kanuni za Uchaguzi.

Katika mafunzo hayo, Msimamizi wa Uchaguzi wa Halmashauri ya Manispaa ya Bukoba Ndugu Nkwera, alisisitiza umuhimu wa ushiriki wa wananchi katika uchaguzi, akitoa maelekezo ya kina kuhusu taratibu za uchaguzi, ikiwemo sifa za kugombea, sifa za wapiga kura, mchakato wa kujiandikisha kupiga kura huku akibainisha kuwa wananchi wanapaswa kushiriki kikamilifu kwa mujibu wa sheria na kanuni za uchaguzi, huku wasimamizi wakihakikisha kuwa mchakato mzima unaendeshwa kwa uwazi na haki.

Bwana Nkwera pia alieleza kwa undani kanuni za uchaguzi wa serikali za mitaa kwa mwaka 2024, akifafanua michakato ya kufuatwa na wasimamizi wa uchaguzi katika kuhakikisha haki na uwazi vinafikiwa. Aidha, alitoa wito kwa wanasemina hao kuhakikisha kuwa kila hatua inazingatia miongozo iliyotolewa na Waziri wa Nchi, Ofisi ya Rais Tawala za Mikoa na Serikali za Mitaa, tarehe 15 Agosti 2024, kama mwongozo wa uchaguzi wa mwaka huu.

Katika mafunzo hayo, wasimamizi wasaidizi walipata fursa ya kula kiapo cha uaminifu, kiapo ambacho kinawataka kuwa waaminifu na waadilifu katika utekelezaji wa majukumu yao ya kusimamia uchaguzi. Kiapo hicho ni sehemu muhimu ya maandalizi ya kuhakikisha kuwa wasimamizi wanafuata sheria na taratibu bila kupendelea upande wowote.

Msimamizi wa Uchaguzi aliendelea kuwasihi wasimamizi wasaidizi kuzingatia viapo vyao, akiwataka kuwa makini na wenye nidhamu katika kutekeleza majukumu yao. Alisisitiza kuwa kazi ya kusimamia uchaguzi ni jukumu zito linalohitaji uadilifu na uaminifu, hivyo ni lazima kila msimamizi ahakikishe kuwa anafuata sheria na kanuni zilizowekwa.

Kadhalika, Msimamizi wa Uchaguzi aliendelea kuwasisitiza Wasimamizi wasaidizi ngazi ya Katana Vijiji kujikita kufanya kazi yao kwa weledi ili kuepusha migigiri mbalimbali ambayo inaweza kutokea katika kipindi hiki cha kuelekea Uchaguzi wa Serkali za Mitaa.

Mafunzo haya ni sehemu ya maandalizi muhimu kuelekea uchaguzi wa serikali za mitaa unaotarajiwa kufanyika mwezi Novemba mwaka huu, ambapo wananchi wa Halmashauri ya Manispaa ya Bukoba na maeneo mengine watapata fursa ya kuchagua viongozi watakaoongoza vijiji, vitongoji na mitaa katika  halmashauri zao.