YALIYOJIRI WAKATI WA MKUTANO WA BARAZA LA MADIWANI KUJADILI TAARIFA ZA ROBO YA KWANZA 2024/2025

Posted on: November 16th, 2024

Mkutano wa Baraza la Madiwani Halmashauri ya Manispaa ya Bukoba umefanyika tarehe 16/11/2024, siku ya Jumamosi kwenye Ukumbi wa Mikutano wa KCU ikiwa ni Baraza Maalum kwa ajili ya kukabidhi tuzo kwa Mkuu wa Mkoa wa Kagera Mhe. Hajjat Fatma Mwassa kwa kuwa kinara katika kusimamia miradi ya maendeleo ndani ya Manispaa ya Bukoba na Mkoa wa Kagera kwa ujumla.

Azimio hilo liliibuliwa kwenye vikao vya Kamati na kukubaliana kwa kauli moja kumpa tuzo ikiwa ni kama zawadi kwa Mkuu wa Mkoa wa Kagera kwa kuwa kinara katika kusimamia miradi ya maendeleo lakini pia kwa kuuwezesha Mkoa wa Kagera kushika nafasi ya kwanza kwenye mbio za Mwenge wa Uhuru 2024 pamoja na kuiwezesha Halmashauri ya Manispaa ya Bukoba kushika nafasi ya tatu Kimkoa sambamba na kushika nafasi ya nane kitaifa.

Mhe. Mstahiki Meya wa Halmashauri ya Manispaa ya Bukoba apongeza Baraza la Madiwani kwa juhudi zake na mikakati ya kuinua mapato ya Manispaa ya Bukoba. “Baada ya kuingia kwenye Baraza hili, tulikuwa na maazimio matatu, la kwanza, ilikuwa ni kusimami miradi ya maemndeleo la pili ni kuhakikisha Halmashauri yetu ya Bukoba imekuwa tulivu na amani lakini azimio la tatu ilikuwa ni kuhakikisha tunaongeza mapato ya Halmashauri yetu ya Manispaa ya Bukoba” Alisema Meya.

Kadhalika, Meya alisema wakati akiingia kwenye Baraza hilo, aliikuta Halmashauri ikikusanya bilioni 1.7 kwa mwaka na sasa kwa wamepandisha mapato ya Halmashauri hiyo kwa kuiwezesha kukukasanya zaidi ya bilioni 2.8 kwa mwaka.

Mkuu wa Wilaya ya Bukoba, Mhe. Erasto Sima, asisitiza uwepo wa amani siku ya kupiga kura, Uchaguzi wa Serikali za Mitaa unaotarajia kufanyika tarehe 27/11/2024. “Ulinzi na usalama kwenye Wilaya yetu umeendelea kuimarishwa kwa kushirikiana na Kamati ya Usalama ya Wilaya kwa kushirikiana na Kamati ya Usalama Mkoa, hivyo wote tuliojiandikisha twendeni wote tukapige kura kuchagua viongozi tunaowataka” Alieleza Sima.

RC. Mwassa awapongeza Wahe. Madiwani wa Halmashauri ya Manispaa ya Bukoba kwa kazi kubwa na nzuri wanazozifanya. “Ninawashukuru na kuwapongeza kwa kazi kubwa na nzuri mnazofanya. Kwa bahati nzuri na kwa kuwa mimi nimekuwa nikitembea saiti mara kadhaa, ninyi wote tulishakutana kwenye Kata zenu na ni ukweli mtupu mnafanya kazi nzuri sana na iliyotukuta” Alisema RC. Mwassa.