ZIARA YA WALIMU NA MAAFISA KUTOKA ZANZIBAR KATIKA MANISPAA YA BUKOBA

Posted on: June 30th, 2025

 Halmashauri ya Manispaa ya Bukoba imepokea ugeni wa Walimu Wakuu, Wakuu wa Shule na Maafisa 73 kutoka wilaya za Magharibi A na B za Zanzibar kwa ziara ya mafunzo na ushirikiano.

Ziara hiyo inalenga kutoa fursa kwa wageni hao kujifunza mbinu mbalimbali za usimamizi wa elimu na kuimarisha mahusiano ya kitaaluma na kijamii kati ya pande mbili za Muungano wa Tanzania. Katika ratiba ya ziara yao, wageni hao wanatarajia kutembelea Shule ya Sekondari Nshambya, Shule ya Msingi Mgeza Mseto pamoja na Chuo cha Ufundi Stadi (VETA) kilichopo Bukoba.

Mbali na ziara ya kielimu, wageni hao pia watatembelea mpaka wa Mutukula uliopo Mkoani Kagera, ikiwa ni sehemu ya kuunga mkono juhudi za Mheshimiwa Rais wa Jamhuri ya Muungano wa Tanzania, Dkt. Samia Suluhu Hassan kupitia kampeni ya Royal Tour inayoitangaza Tanzania kimataifa.

Akizungumza kwa niaba ya wageni, mmoja wa viongozi wa msafara huo alieleza kuwa ujio wao Bukoba unalenga kuimarisha mshikamano wa Muungano wa Tanzania Bara na Zanzibar ambao umeendelea kudumu kwa amani kwa zaidi ya miaka 60. "Tunaamini kuwa kupitia ziara hii, tutapata uzoefu mpya wa kiutendaji na pia kuendeleza mahusiano ya kindugu na kitaifa," alisisitiza.

Uongozi wa Manispaa ya Bukoba umewakaribisha kwa moyo mkunjufu wageni hao na kusisitiza umuhimu wa mashirikiano haya kama njia ya kuboresha sekta ya elimu na kuimarisha Muungano wa nchi yetu.