DC. SIMA AKEMEA TABIA YA WANAWAKE KUTELEKEZA WATOTO WACHANGA.

Posted on: March 8th, 2025

Mkuu wa WIlaya ya Bukoba Mhe. Erasto Sima amewakemea wanawake wote wenye tabia ya kuwatelekeza watoto wachanga punde tu wanapojifungua na kupotelea kusikojulikana.

Sima ameyasema hayo wakati akitoa hotuba yake kwenye sherehe za maadhimisho ya Siku ya Kimataifa ya Wanawake ambayo kwa Halmashauri ya Manispaa ya Bukoba imefanyika kwenye viwanja vya Mayunga.

Ameeleza kuwa, tabia hii ya wanawake kutelekeza watoto wachanga imeendelea kushika hatamu ambapo imepelekea watoto wengi kukosa malezi ya Mama na hivyo kupelekwa kwenye vituo vya kulelea watoto yatima.

“Pamoja na umuhimu wa siku hii kubwa kimataifa, bado Wanawake mmekuwa na dosari kadhaa ambazo lazima tuziseme. Tabia ya wanawake wachache kuwatupa watoto wachanga imeendelea kumea hapa Bukoba na mimi nikiwa kama Mwenyekiti wa Kamati ya Usalama, Wilaya tunajipanga vyema ili kuwatafuta wale wote wanaofanya kitendo hiki kibaya. Alisema Mkuu wa Wilaya.

Akisisitiza kuhusu ukatili huu DC. Sima alisema, “Ndugu zangu Wanawake, hili jambo sio jema, Wiki iliyopita kwenye moja ya Kata zetu, kimeokotwa kichanga kidogo kimeshafariki kitu ambacho hakileti picha nzuri, zaidi sana hata mwezi uliopita, kiliokotwa kichanga ambacho kilitelekezwa kwenye banda la kuuzia nyanya na mpaka sasa bado kinaendelea vizuri pale hosipitali ya Zamzam, Kwa hiyo ndugu zangu niwaombe muache tabia hii mara moja”

Nayo Idara ya Maendeleo ya Jamii, Halmashauri ya Manispaa ya Bukoba wakiwa katika maandalizi ya siku hii muhimu kwa Wanawake, iliweza kuwaunganisha wanawake mbalimbali na kutembelea kituo cha kulea watoto yatima cha Ntoma kilichopo Maruku tarehe 6/3/2025 na kutoa misaada mbalimbali kabla ya kuandaa kongamano la Wanawake mashsusi kwa ajili ya kuzungumzia fursa mbalimbali ambazo wanawake wanatakiwa kuzichangamkia lakini pia kujadili changamoto mbalimbali zinazowakabili.

Maadhimisho ya siku ya Kimataifa ya Wanawake yamefanyika Jijini Arusha na mgeni rasmi akiwa ni Rais wa Jamhuri ya Muungano wa Tanzania Mhe. Datari Samia Suluhu Hassan na yakiongozwa na kauli mbiu isemayo, “Wanawake na Wasichana 2025, Tuimarishe Haki, Usawa na Uwezeshaji”