DC. SIMA AONGOZA KIKAO CHA TATHMINI YA MKATABA WA LISHE NGAZI YA KATA MANISPAA YA BUKOBA

Posted on: May 10th, 2025

Bukoba, 10 Mei 2025* — Mkuu wa Wilaya ya Bukoba, Mhe. Erasto Sima, ameongoza kikao cha tathmini ya utekelezaji wa mkataba wa afua za lishe ngazi ya Kata kwa robo ya tatu ya mwaka wa fedha 2024/2025 kilichofanyika katika Ukumbi wa Mikutano wa Halmashauri ya Manispaa ya Bukoba.

Kikao hicho kimewakutanisha viongozi mbalimbali wakiwemo Katibu Tawala wa Wilaya, Bi. Proscovia Jaka Mwambi, wakuu wa idara na vitengo kutoka sekta ya elimu ya msingi na sekondari, mchumi wa Halmashauri pamoja na watendaji wa Kata.

Akitoa taarifa ya hali ya utekelezaji wa viashiria vya mkataba wa lishe, Afisa Lishe wa Manispaa ya Bukoba, Bi. Gisera Richard, amesema kikao hicho kimelenga kuchambua changamoto zilizopo na kuweka mikakati madhubuti ya kuboresha matokeo ya utekelezaji wa afua za lishe katika ngazi ya jamii.

“Miongoni mwa malengo yetu ni kuhakikisha viashiria vyote vya lishe vinafikiwa kwa ufanisi na kwa ushirikiano wa sekta zote zinazohusika,” alieleza Bi. Afisa Lishe.

Katika taarifa yake, Bi. Gisera aliainisha baadhi ya mafanikio yaliyopatikana hadi kufikia robo hii ya mwaka, ikiwemo ongezeko la utoaji wa elimu ya lishe mashuleni na usambazaji wa virutubisho kwa watoto chini ya miaka mitano. Hata hivyo, alibainisha pia changamoto kadhaa kama vile uhaba wa rasilimali fedha, ufuatiliaji hafifu wa baadhi ya maeneo, na uelewa mdogo wa jamii kuhusu lishe bora.

Kwa upande wake, Mkuu wa Wilaya, Mhe. Sima, alisisitiza umuhimu wa ushirikiano kati ya viongozi wa kata na jamii katika kuhakikisha kuwa afua za lishe zinafikiwa kwa walengwa wote, hasa watoto, wajawazito, na akina mama wanaonyonyesha.

“Lishe bora ni msingi wa afya na maendeleo ya taifa. Tunapaswa kushirikiana kwa karibu kuhakikisha kila mtoto anapata haki yake ya lishe bora,” alisema Mhe. Sima.

Bi. Proscovia Jaka Mwambi alihimiza watendaji wa kata kuwa mabalozi wa mabadiliko katika maeneo yao kwa kuhakikisha taarifa sahihi za lishe zinafika kwa wananchi na kuchochea mabadiliko chanya ya tabia.

Kikao hiki ni mfululizo wa mikutano ya tathmini inayolenga kuimarisha utekelezaji wa mkataba wa lishe kwa ushirikiano wa sekta mbalimbali kama elimu, afya, na maendeleo ya jamii ili kuhakikisha kuwa Bukoba inasonga mbele katika mapambano dhidi ya utapiamlo.