KIONGOZI WA MBIO ZA MWENGE WA UHURU KITAIFA AFURAHISHWA KAGERA INAVYOTEKELEZA MKAKATI WA SERA YA VIJANA YA MIAKA KUMI 2024-2034

Posted on: September 28th, 2024

Kiongozi wa Mbio za Mwenge wa Uhuru Kitaifa Ndugu Godfrey Eliakimu Mnzava afurahishwa na namna mkoa wa Kagera ulivyotekeleza Sera ya Taifa ya maendeleo ya vijana ya mwaka 2007 na kutekeleza kwa vitendo Mkakati wa miaka kumi wa Sera hiyo wa mwaka 2024 hadi 2034 kwa kuwatengenezea vijana Kongani za utekelezaji wa shughuli zao.

Ndugu Mnzava alisema mkoa wa Kagera umeelewa sera na mkakati wake wa kuendeleza vijana baada ya Mwenge wa Uhuru kutembelea na kuona kongani ya shughuli za vijana na namna walivyowezeshwa ili kujipatia ajira.

Akiongea mbele ya wananchi mara baada ya kupata nafasi kutoka kwa Kiongozi wa Mbio za Mwenge wa Uhuru Kitaifa, Mkuu wa Mkoa wa Kagera Hajjat Fatma Abubakar Mwassa alisema mkoa wa Kagera umeandaa mkakati wa kuhakikisha vijana wanapatiwa maeneo ya kutekeleza shughuli zao ili waweze kujiajili, kuongeza ujuzi na kujipatia kipato kwa kufanya shughuli zao kwa pamoja.

Aidha, Mkuu wa Mkoa Hajjat Fatma Mwassa alisema lengo la mkoa ni kuhakikisha vijana wanarudi mashambani kulima na kuzalisha kahawa kwa wingi. "Tayari tumelima shamba la ekari elfu kumi zitakazowanufaisha vijana elfu kumi kwa kilimo cha kisasa cha kahawa na tayari tumewapatia vijana wanaendelea na kilimo wilayani Muleba na lengo tutazifikia wilaya zote." Alifafanua Mkuu wa Mkoa Mwassa.

Kwa upande mwingine Kiongozi wa Mbio za Mwenge wa Uhuru Kitaifa Ndugu Mnzava baada ya kuridhishwa namna Kongani ya vijana Manispaa ya Bukoba inavyotoa ajira kwa vijana alielekeza Mikoa mingine kwenda mkoani Kagera kujifunza mamna ya kutekeleza Mkakati wa Sera ya Taifa ya Maendeleo ya Vijana ya mwaka 2007 kwa miaka kumi 2024 hadi 2034.

Mwenge wa Uhuru mwaka 2024 umeendeleza mbio zake mkoani Kagera katika Manispaa ya Bukoba Septemba 28, 2024 kwa kutembelea na kuona, kuzindua, kufungua na kuweka mawe ya msingi jumla ya miradi ya maendeleo sita (6) yenye thamani ya gharama ya shilingi bilioni 4.9

Mwenge wa Uhuru unatarajia kuhitimisha mbio zake mkoani Kagera Septemba 29, 2024 katika Wilaya ya Muleba na kukabidhiwa mkoani Geita Septemba 30, 2024