MSIMAMIZI UCHAGUZI WA SERIKALI ZA MITAA MANISPAA YA BUKOBA ASISITIZA UMOJA NA MSHIKAMANO

Posted on: October 6th, 2024

Msimamizi wa Uchaguzi wa Serikali za Mitaa Halmashauri ya Manispaa ya Bukoba Ndg. Jacob S. Nkwera ameendelea kuwasisitiza wale wote waliopata nafasi ya uandikishaji wa wapiga kura wa Serikali za Mitaa kuwa na umoja na mshikamano katika kipindi chote cha uandikishaji wa wapiga kura.

Ameyasema hayo leo tarehe 6/10/2024 wakati wa ufunguzi wa mafunzo ya Waandikishaji wapiga kura Uchaguzi wa Serikali za Mitaa Uchaguzi unaotarajia kufanyika tarehe 27/11/2024 ukienda kwa kauli mbiu ya “Uchaguzi wa Serikali za Mitaa, Sauti ya Wananchi, jitokeze kushiriki Uchaguzi”

“Ninawasihi muwe na ushirikiano mzuri na wa karibu Wasimamizi Wasaidizi wa Uchaguzi ngazi ya Kata na Mtaa wakati wote mtakapokuwa mnatekeleza majukumu yenu na ikiwa mnahitaji ufafanuzi au maelekezo yeyote, msisite kuwasiliana na wasimamizi wenu katika ngazi ya Kata na Mitaa” Alisema Nkwera.

Wakati zoezi la uandikishaji likiwa linaendelea, Msimamizi wa Uchaguzi amewataka Waandikishaji kuwapa ushirikiano mawakala wa vyama vya siasa kwa ajili ya utambuzi wa wakazi wa Mitaa wenye sifa ya kuandikishwa kupiga kura.

Aidha katika uandikishaji mawakala wa vyama vya siasa hawataruhusiwa kuchukua orodha ya wapiga kura walioandikishwa. Pia haitaruhusiwa wananchi wanaokuja kujiandikisha kuulizwa maswali yanayohusu shughuli zao, uanachama wa chama cha siasa au dini.

Kwa kuhitimisha hotuba yake, Ndg. Nkwera amesisitiza umuhimu wa Waandikishaji wa orodha ya wapiga kura wa Serikali za Mitaa kutekeleza majukumu yao kwa umakini katika kila eneo hasa utunzaji wa orodha ya wapiga kura watakaoandikishwa katika vituo vyao katika kipindi chote cha uandikishaji wapiga kura. Kutokuwa makini katika utunzaji wa orodha hiyo kutapelekea athari kubwa katika ukamilishaji wa zoezi hili muhimu na kuwakumbusha kuzingatia maelekezo yote yatakayotolewa na Msimamizi wa Uchaguzi ili waweze kuyafanyia kazi wakati wote.