MWENGE WA UHURU WAHITIMISHA MBIO ZAKE MKOANI KAGERA.

Posted on: September 15th, 2025

Mwenge wa Uhuru 2025 umemaliza mbio zake katika Mkoa wa Kagera na umekabidhiwa rasmi kwa Mkoa wa Kigoma leo, Septemba 15, 2025, ambapo Mkuu wa Mkoa wa Kagera, Mhe. Hajjat Fatma Mwassa, amemkabidhi Mwenge huo Mkuu wa Mkoa wa Kigoma, IGP Balozi Simon N. Sirro.

Katika kipindi chote cha mbio zake mkoani Kagera, Mwenge wa Uhuru umepita katika Halmashauri zote nane za mkoa huo ambazo ni Muleba, Bukoba Vijijini, Manispaa ya Bukoba, Missenyi, Kyerwa, Karagwe, Ngara na Biharamulo.

Mwenge huo umekimbizwa umbali wa takribani kilomita 1,040 na umekuwa umefanikisha kutembelea, kukagua, kuzindua na kuweka mawe ya msingi katika miradi 58 ya maendeleo.

Miradi hiyo imegusa sekta mbalimbali ikiwemo afya, elimu, maji, barabara, nishati na michezo yenye thamani inayokadiriwa kufikia shilingi bilioni 23.8.

Aidha, kupitia mbio hizo wananchi wamepata fursa ya kushiriki moja kwa moja katika uzinduzi wa miradi hiyo na kushuhudia mafanikio ya jitihada za Serikali katika kuwaletea maendeleo.

Mwenge wa Uhuru umeendelea kuwa chombo muhimu cha kuhamasisha mshikamano, uzalendo na ushirikiano wa kitaifa sambamba na kupiga vita rushwa, dawa za kulevya na VVU/UKIMWI.

Kwa kukabidhiwa mkoani Kigoma, Mwenge wa Uhuru unaendelea na mbio zake kitaifa kwa mwaka 2025 kwa lengo la kuimarisha mshikamano wa Watanzania na kufuatilia utekelezaji wa miradi ya maendeleo nchini huku ukiwa na kauli mbiu isemayo: “Jitokeze kushiriki Uchaguzi Mkuu wa mwaka 2025, kwa Amani na Utulivu.”