PASS TRUST YAENDELEA NA JUKWAA LA BIASHARA BUKOBA, YAWEKA MKAZO KWA USHIRIKIANO NA TAASISI ZA FEDHA KUKUZA SEKTA YA KILIMO

Posted on: October 10th, 2025

 Taasisi ya Private Agricultural Sector Support (PASS) Trust imeendelea na Jukwaa la Biashara (Bank Forum 2025) lililofanyika mjini Bukoba, likiwakutanisha maafisa wa benki na wawakilishi wa taasisi za fedha kutoka mikoa ya Kagera na Geita.

Jukwaa hilo limebeba kaulimbiu ya kuimarisha ushirikiano kati ya PASS Trust na taasisi za fedha, ikiwa ni jitihada za pamoja za kukuza upatikanaji wa mitaji kwa wakulima, wajasiriamali na wafanyabiashara wadogo nchini — hususan katika sekta zinazochangia uchumi wa vijijini kama kilimo, mifugo, uvuvi na mazao ya misitu.

Akizungumza wakati wa ufunguzi wa jukwaa hilo, Mkurugenzi wa Biashara wa PASS Trust, Bw. Adam Kamanda, alisema kuwa taasisi hiyo itaendelea kushirikiana kwa karibu na benki mbalimbali nchini ili kuhakikisha wakulima na wafanyabiashara wadogo wanapata huduma za kifedha zenye masharti nafuu, zinazowawezesha kuongeza uzalishaji na kipato.

> “Taasisi za fedha ni washirika wetu muhimu katika safari ya kujenga uchumi shirikishi na endelevu. Kupitia PASS Trust, tumejipanga kuhakikisha kila mkulima anapata fursa ya kupata mikopo na mitaji itakayomsaidia kuboresha uzalishaji wake,” alisema Bw. Kamanda.

Aliongeza kuwa PASS Trust imekuwa ikisaidia wakulima wanaojihusisha na mazao ya kanda ya Ziwa kama kahawa, ndizi, miwa, pamba na mazao mengine ya biashara, kwa kuwapatia dhamana ya mikopo (credit guarantees) na mafunzo ya usimamizi wa biashara ili kuongeza tija na thamani ya mazao yao.

Kwa upande wao, baadhi ya wawakilishi wa benki walioshiriki jukwaani wameipongeza PASS Trust kwa kuandaa jukwaa hilo, wakisema limekuwa jukwaa muhimu la kujadiliana changamoto na fursa katika sekta ya fedha na kilimo.

Wamesema ushirikiano huo unatoa mwanga mpya wa kiuchumi kwa wakulima wadogo, hasa wale wanaokabiliwa na changamoto za upatikanaji wa dhamana na mikopo kutoka taasisi za kifedha.

Aidha, jukwaa hilo limeelezwa kuwa ni sehemu ya mwendelezo wa maadhimisho ya Miaka 25 ya PASS Trust, tangu kuanzishwa kwake mwaka 2000, ambapo taasisi hiyo imekuwa kinara katika kusaidia wakulima wadogo na biashara ndogo za kilimo kupata mitaji yenye masharti nafuu kupitia ushirikiano na taasisi za kifedha nchini.

Kupitia jukwaa hilo, PASS Trust inalenga kuendelea kujenga uchumi jumuishi, endelevu na shindani, unaowezesha wananchi wote kushiriki kikamilifu katika shughuli za uzalishaji na biashara.

> “Tunaamini katika nguvu ya ushirikiano. PASS Trust itaendelea kuwa kiunganishi kati ya wakulima, taasisi za fedha na wadau wengine katika kuhakikisha sekta ya kilimo inakuwa chachu ya maendeleo ya Taifa,” alihitimisha Bw. Kamanda.

 Jukwaa la Biashara la mwaka huu limehusisha mijadala ya kitaalamu, ubadilishanaji wa uzoefu, na mawasilisho kuhusu fursa za uwekezaji katika sekta ya kilimo na biashara ndogo, likiwa sehemu muhimu ya safari ya PASS Trust kuelekea miaka 25 ya mafanikio katika kuwawezesha Watanzania kiuchumi