"TUMEWAPA MIKOPO, HAKIKISHENI MNAIRUDISHA KWA WAKATI" DC SIMA

Posted on: January 27th, 2025

Halmashauri ya Manispaa ya Bukoba, ikiongozwa na Mkuu wa Wilaya ya Bukoba Mhe. Erasto Sima  leo  tarehe 27/1/2025, imekabidhi rasmi mfano wa hundi yenye thamani ya SH. 417,200,000 kwa wale wote walioomba na kukidhi vigezo kwenye mikopo ya Wanawake, Vijana na Watu wenye Ulemavu.

Hafla hiyo ya makabidhiano imefanyika kwenye uwanja wa Kaitaba ambapo jumla ya vikundi 79 vimepata fedha hizo  huku vikundi vya wanawake vikiwa 41 na kupata sh. 208,000,000, na vikundi vya vijana vikiwa 32 na kupewa sh. 197,000,000 wakati huohuo vikundi vya watu wenye ulemavu  vikiwa 6 na kupewa SH. 12,200,000.

Mkurugenzi wa Halmashauri ya Manispa ya Bukoba Ndg. Jacob S. Nkwera aliieleza hadhara hiyo kuwa kwenye fedha zote hizo ambazo zimetolewa leo, jumla ya SH. 324,200,000 ni fedha kutoka michango ya asilimia 10 ya mapato ya ndani ya Halmashauri huku Sh. 93,000,000 zikiwa ni fedha za marejesho ya vikundi vilivyokopa miaka ya nyuma.

Nae Mhe. Mstahiki meya akiongea na Wajasiliamali hao ambao wamepokea fedha hizo alisema, tuna haki ya kujivunia kwa kuona mapato yetu ya ndani yanakusanywa na kazi zinazofanyika zinaoneka. “Nendeni mkazitume hela hizi kwa malengo mliyokusudia” Alisisitiza Mstahiki Meya wa Manispaa ya Bukoba, Mhe. Godson Gypson.

“Mlikuwa mkipata mikopo hii kutoka Halmashauri, lakini Mhe. Rais akawa amesimamisha kwanza jambo hili. Na nia kubwa ya kusimamishwa ni kwa jinsi vikundi vingi havikuwa vimeonyesha uaminifu tunakopa fedha, haturudishi, Awamu hii hatupaswi kuleta mzaha” Alisema Mkuu wa Wilaya ya Bukoba.

Vilevile, Mkuu huyo wa Wilaya alisema, pamoja na kuwepo kwa miezi mitatu kabla hamjaanza kurejesha mikopo hiyo, lakini bado hamzuiliwi kuanza kufanya marejesho muda wowote kuanzia sasa kama mtu unaona mambo yako yanaenda vizuri wala huna haja ya kukaa na hela ndani.

Ikumbukwe kuwa wanufaika hawa wa mikopo wataanza kufanya marejesho ya mikopo hii kuanzia mwezi wa nne tarehe kama ya leo.