Watumishi wa Halmashauri ya Manispaa ya Bukoba wapewa mafunzo kuhusu Mfuko wa Fidia kwa Wafanyakazi

Posted on: October 7th, 2025

Watumishi wa Halmashauri ya Manispaa ya Bukoba wamepewa mafunzo maalumu kuhusu huduma, madhumuni na taratibu za Mfuko wa Fidia kwa Wafanyakazi (WCF), hatua inayolenga kuongeza uelewa wa wadau wa umma kuhusu haki za wafanyakazi na jinsi ya kuwasilisha madai ya fidia.

Mafunzo hayo, yaliyoandaliwa kwa ushirikiano na WCF, yalijumuisha mada za utambuzi wa ajali na magonjwa yanayotokana na kazi, mchakato wa kuwasilisha madai kupitia mfumo wa mtandaoni na wajibu wa mwajiri katika kuhakikisha wafanyakazi wamejiandikisha na kupata mafao yaliyoainishwa kisheria.

WCF imekuwa ikiendesha mfululizo wa semina za aina hii katika mikoa mbalimbali ili kuhamasisha uandikishaji na utoaji wa huduma za fidia.

Wahudhuliaji walifundishwa pia kuhusu umuhimu wa nyaraka, tathmini za ulemavu (impairment assessments) na jinsi ya kutoa taarifa za ajali au ugonjwa unaohusiana na kazi kwa wakati ili kuharakisha mchakato wa malipo.

Mafunzo hayo yamekuja wakati Mfuko wa Fidia unaendelea kutangaza matumizi ya mfumo wake wa mtandaoni kwa ajili ya uwasilishaji wa madai na ufuatiliaji wa michango.

Afisa kutoka WCF Mkpa wa Geita ambaye pia anahusika moja kwa moja na Mkoa wa Kagera Ndg. Jimmy Msangi alisema mafunzo ni sehemu ya juhudi za taasisi hiyo za kuhakikisha waajiri na watumishi wa sekta za umma na binafsi wanafahamu haki na wajibu wao chini ya Sheria ya Fidia kwa Wafanyakazi (Sura 263), ikiwa ni pamoja na hatua za kisheria za kuchukua dhidi ya waajiri wasiozingatia masharti ya usajili na michango.

Kwa upande wake, Halmashauri ya Manispaa ya Bukoba ilibainisha kuwa kuimarisha uelewa wa watumishi juu ya mfuko huo kutasaidia kupunguza ukosefu wa taarifa, kuongeza uwazi katika utumizi wa rasilimali na kuhakikisha wafanyakazi wanatunzwa pale panapotokea ajali au magonjwa yanayotokana na kazi.

Mafunzo ya hivi karibuni yanaambatana na kampeni za kitaifa za WCF za kueneza matumizi ya huduma za mfuko na kuhimiza waajiri kuwasilisha madai kupitia jukwaa la kielektroniki ili kurahisisha huduma na kupunguza ucheleweshaji wa malipo ya fidia.

WCF pia imekuwa ikitoa mafunzo maalumu kwa wataalamu wa afya ili kuboresha utambuzi na tathmini ya magonjwa na ulemavu unaohusiana na kazi.