ZIARA YA WAHESHIMIWA MADIWANI NA TIMU YA WATAALAM YAFANA TABORA

Posted on: April 10th, 2025

Bukoba Yajifunza Mbinu za Maendeleo Kutoka Tabora

Ziara hiyo Yaleta Mwangaza Mpya kwa Manispaa ya Bukoba 

Tabora, 10 Aprili 2025 — Ujumbe wa Madiwani kutoka Halmashauri ya Manispaa ya Bukoba, ukiongozwa na Mstahiki Meya Mheshimiwa, Godson Gypson, umefanya ziara ya mafunzo katika Halmashauri ya Manispaa ya Tabora kwa lengo la kujifunza mbinu bora za uendeshaji wa Halmashauri, usimamizi wa miradi ya kimkakati, na ukusanyaji wa mapato ya ndani.

Ujumbe huo uliambatana pia na Mkurugenzi wa Halmashauri, Bw. Jacob Nkwera, pamoja na Mbunge wa Bukoba Mjini, Mheshimiwa Steven Byabato. Ziara hiyo ililenga kupata uzoefu wa moja kwa moja kutoka kwa Manispaa ya Tabora ambayo imefanikiwa katika utekelezaji wa miradi mbalimbali chini ya Mpango wa TACTIC.

Miongoni mwa miradi iliyotembelewa ni pamoja na:

• Ujenzi wa Soko Kuu la Manispaa

• Ujenzi wa Stendi ya Mabasi ya Kisasa

• Miundombinu ya barabara inayoboreshwa na kupanuliwa

Pia, ujumbe huo ulipata fursa ya kujifunza kuhusu matumizi ya mifumo ya kisasa ya ukusanyaji wa mapato, ambayo imechangia kwa kiasi kikubwa kuongeza mapato ya ndani ya halmashauri ya Tabora.

Akizungumza wakati wa ziara hiyo, Mhe. Meya Godson Gypson alisema:

“Tumejifunza mambo mengi muhimu kutoka kwa wenzetu wa Tabora. Tunakwenda kushirikiana na wataalamu wetu wa Bukoba ili kuona namna bora ya kuyatekeleza kwa ufanisi.”

Kwa upande wake, Mhe. Mbunge, Steven Byabato alieleza kuwa ziara hiyo imempa mwanga kuhusu namna miradi ya kimkakati inavyoweza kufanikishwa kupitia ushirikiano wa karibu kati ya viongozi wa kisiasa na wataalamu wa Halmashauri.

Mbali na miradi ya maendeleo, ujumbe huo ulijifunza pia kuhusu mbinu za kudumisha usafi wa mji na kampeni za upandaji miti, maeneo ambayo Bukoba imepanga kuyawekea mkazo kwa ajili ya kuboresha mazingira na ustawi wa wakazi wake.